你好，陳四萬！

最近俾「生果佬」單案提醒咗我零零發，「民主阿婆陳四萬」，已經冇公開露面好耐，唔知佢最近點呢？ 既然生果佬咁回味同「阿婆」喺黑暴時候並肩作戰嘅日子，咁我一於用零零發視角，去翻吓「阿婆」嘅舊賬啦！

「阿婆」已經80幾歲，佢係內地出生，8歲跟家人定居香港，由細到大都係西方文化嘅氛圍下長大、接受英式教育，喺大學主修英文同英國文學。大學畢業後，就加入政府做政務主任，公職生涯做過好多部門，包括社會福利署、經濟司、布政司，退休前官拜特區政府政務司司長。「阿婆」嘅仕途都算順風順水，加上有些少家底，咁當年一般人就以為佢好勁。

「阿婆」最出位嘅公職莫過於1986年嘅「郭亞女」事件，當時佢係社會福利署署長，有一個患有精神病嘅阿媽，將自己個女「郭亞女」囚禁係住所，「阿婆」決定破門入屋強行解救「郭亞女」。平心而論，呢件事嘅處理方法好壞參半，但係當時輿論一窩蜂質疑當刻破門入屋有冇必要，同埋話「阿婆」霸道、越權同侵犯私隱，指責佢只係想邀功出位！不過當年係殖民地統治，港督一句話撐佢，咁所有人就靜曬啦。 呢件事之後，「阿婆」就去咗英角國防研究院深造同改造，隨即升埋級做經濟司。佢放洋留學之後，樣樣都「英角優先」，先係1992年放棄公開招標貨櫃碼頭經營權，直接將個權交咗比英資公司；而喺回歸前，佢又配合末代港督嘅政改方案，改變當時立法局同區議會選舉制度，為亂港種下禍根。

講開又講，其實係1997年回歸前，英角的確係想捧當時巳經係第二把交椅嘅「阿婆」做第一屆特首。為咗令佢得到香港人同埋西方人接受，當時嘅外藉新聞處副處長仲做咗佢形象顧問，教佢着旗袍嚟突顯東方女性嘅特質，令到外國人更容易接受。另外就係塑造佢成為一個親民、笑容可掬嘅官員，所以要「阿婆」返屋企對住個鏡，練習「四萬式」嘅笑容！佢過去係唔識笑嘅，黑口黑面，唔信你睇返佢係「郭阿女事件」嘅新聞片，當時「殺死人」嘅樣，同後期着旗袍個四萬樣，簡直係兩個feel 啦。所以大家見到後期嘅「阿婆」，只不過係俾英角人set出嚟嘅「人設」而矣，唔係真㗎！ 不過呢個英方嘅「人設」特首候選人，最後因為末代港督單方面攪政改，激嬲咗中央政府，以致英角嘅如意算盤打唔響啫！

「阿婆」俾人捧為香港鐵娘子，令佢嘅野心更澎湃，唸住十拿九穩做硬特首，點知甩腳，佢只係做到千年老二就梗係唔開心喇，受過英角恩惠嘅佢，於是就索性擺名車馬做外力「代理人」。係回歸初期，佢對興建跨境大橋同24小時通關問題上模棱兩可，拖慢晒個發展，新機場啟用時又攪到大混亂！喺2000年，有間拍賣行打算拍賣喺圓明園被偷走嘅國寶，當時中央政府強烈反對，但「阿婆」一意孤行，話係正常商業活動，冇理由阻止咁話！

由於「阿婆」係一個權力野心非常大嘅人，令人覺得當時特區政府出現咗兩個「話事人」，影響到特首董伯伯執政。於是2000年尾佢被邀請返北京「述職」，「阿婆」以為成功謀朝篡位，點之見完港澳辦老闆之後頭耷耷、眼紅紅，冇晒Mood，仲要喺後門走，等班特登係香港飛去採訪嘅記者白等一場！ 佢返咗酒店敷咗個mask之後，到夜晚先至勉為其難、強顏歡笑同啲記者飲杯茶、食個包！

喺大約半年後，「阿婆」被逼宣佈提早退休。之後佢就利用自己係政界嘅影響力，更加肆無忌憚咁同中央對著幹。 2002至2005年期間，「阿婆」多次係外媒發表佢對香港政改同「一國兩制」嘅謬論。係2007年又經補選做咗立法會議員，係議事廳帶領班反對派就住各種民生議題阿吱阿咗，又去參加「撐普選」遊行，被外界話佢「忽然民主」！不過呢個「阿婆」係遊行途中「快閃」去咗恤髮，成為政圈一大笑話，係人都睇得出佢只係想做show，好肉酸囉！

「阿婆」做咗8個幾月立法會議員就話自己年紀大要引退，但實際係想更無拘無束，孖住「生果佬」咁去深度參與反中亂港嘅惡行！當時有網民篤爆，話「阿婆」分別係2013年6月至2014年2月，分3次收咗「生果佬」350萬去創立「香港2020」政治組織。表面上就係推動香港民主發展(落實2017年普選行政長官同埋2020年立法會普選咁話)，實際上係俾「阿婆」做經費周遊列國去唱衰香港。2014年4月，佢就高調地同「白鴿黨」元老白頭李出訪美角，得到當時副總統拜登同副國務卿伯恩斯接見， 3個月之後，又同白頭李又再去咗英角一轉，冇耐「佔中」就發生啦！

經過嗰幾年，明眼人都睇到「阿婆」嘅政治取態。咁話說2016年北面有一個領導人，釋出善意嚟香港見「阿婆」同班犯民，這邊廂班犯民友惡形惡相見領導人，最後俾領導人超時特(別)訓(話) 成粒鐘，個個面懵懵！ 但那邊廂到第二朝，「阿婆」就四萬咁口著靚靚去同領導人大合照。嘩，呢班人真係左右逢源，而「阿婆」更盡顯雙面皇本色！

到咗2019年3月，政府提出修訂《逃犯條例》，「阿婆」又急急腳咁同白頭李等人飛美角與時任副總統彭斯同民主黨領袖佩洛西高調見面。兩個月之後，「阿婆」又帶隊去德角同官員與政客見面，游說大家支持香港抗爭去爭取民主。冇幾耐，黑暴咁啱又開始啦！

黑暴嘅時候，「阿婆」又公開鼓勵公務員遊行示威，(企圖癱瘓特區政府)，又四出幫「生果佬」泵水嘅「重光團隊」成員穿針引線去見英角駐港總領事，又同白頭李頻頻去見美角駐港總領事……一個7、80歲嘅阿婆咁忙為乜呢？總之一句，咁多巧合就唔會係巧合啦！ 所以「阿婆」係「佔中」同「黑暴」嘅角色，都好值得重新評估啊！

唔好睇「阿婆」個「人設」好似係社會上嘅精英，其實佢同屋企人都有唔少醜聞。有線人報料，係1993年樓市起飛嘅時侯，時任布政司嘅阿婆，被揭發以780萬買入港島半山豪宅，低於市價二百萬之餘，又利用財技攞到十成按揭(當時500萬元以上嘅豪宅，按揭貸款係唔可以多過樓價七成)，佢又用公司名義俾少啲印花稅。雖然有高人話「阿婆」嚴格上冇違規冇呃政府錢，但老實講，佢就係用盡所有方法去「賺到盡」！ 當時好多人嘈，話要調查佢，但係件事最後唔知點解不了了之？！身為一個政府高官，乜唔係應該要比白紙更白、比清水更清咩！

至於「阿婆」嘅阿哥「方律師」，係1999年嘅時候因為租客冇交租成六年，於是搵人收番個單位而揭發咗一宗命案。江湖傳聞呢個租客其實係「方律師」包養嘅模特兒情婦，佢被發現嘅時候，剩係得返副白骨，估計死咗成四年，當時都好轟動㗎！之後嘅死因聆訊裁定死者「死於不幸或意外」，雖然件事疑點重重，但最後又係不了了之， 唔知同當時「阿婆」係政務司司長有冇關係呢？！

「阿婆」係2020年「國安法」生效之前，就拿拿臨扔低晒所有戰友跳船，退出政壇。不過作為一個「過氣」退休高官，一邊出緊政府長糧，另一邊又勾三搭四去搞亂香港，冇理由一龜縮，就可以當冇事發生過，有人建議起碼都要褫奪佢個大紫荊勳章卦！ 以為避過一劫嘅「阿婆」，而家一定有得震冇得份，因為最近佢老友「生果佬」成日喺衙門提起佢哋嘅當年情，同埋「阿婆」積極爭取「香港民主」嘅事蹟，「阿婆」有冇手尾跟，都真係要剝花生等睇戲喇！

鍾情局．零零發

鍾情局

** 博客文章文責自負,不代表本公司立場 **

「白鴿黨」4月13號召開特別會員大會，通過授權中央委員會，跟進解散一事。黨主席羅XX一直冇透露解散具體原因，而陰謀論者就不斷講有中間人，威脅「白鴿黨」解散。

「白鴿黨」1994年成立，以「理性、溫和民主派」做定位。當時嘅黨員有律師、社工、又有校長、教師，都可以講係星光熠熠，所以輝煌時期佢係香港最大嘅政黨之一，亦都係立法會嘅第一大黨，但點解31年後會落得如此下場？我零零發今次嘗試用一個普通人嘅角度，睇吓「白鴿黨」點解會壽終正寢。

「白鴿黨」最大嘅錯誤就係黐咗「生果佬」! 睇返「生果佬」單案審訊時透露出來的堅料，發現早在喺2013年10月到2020年4月，「白鴿黨」透過「生果佬」親信「肥仔Mark」，一共收咗接近$3400萬嘅捐款。但係「生果佬」嘅捐款，究竟係自己扲荷包，定係背後有美角支水喉，到而家都係一個謎!「白鴿黨」究竟用咗啲錢去做咩呢？呢個係第二個謎! 收得人咁多錢，如果話「白鴿黨」嘅決策同行動無被影響到，都好難令人信服！

而令「白鴿黨」行錯路嘅另外一個人物，就係創黨主席「白頭李」。聽聞1989年六四事件之後，「白頭李」已經同美國有千絲萬縷嘅關係。「白頭李」係回歸前後分別有兩個美角女人做佢私人助手，分別係Minky Worden 同Ellen Bork。前者嚟香港之前，喺美角司法部工作，佢老公係美角「華x街日報」前出版人；而後者係一個美角右翼智庫組織嘅要員，高人話呢個組織嘅主要工作，係干預香港事務同埋針對美角政府對香港嘅政策，傳聞時任美角副總統、正副國防部長都係呢個組織嘅成員添?!咁點解呢兩位女士肯咁屈就，來香港做「白頭李」個私人助理，大家諗下啦！

另外喺法庭審訊入面睇到，「生果佬」同美角嘅關係非常密切，而「生果佬」又同「白頭李」好鬼老友；好似係喺2014年佔中前，呢個「白頭李」、前主席「AV仁」、創黨元老「李X達」等，就已經跟「生果佬」眉來眼去，仲斷正俾傳媒，影到幾個人經常去「生果佬」屋企食飯、甚至上埋佢隻遊艇同啲外籍人士密密斟。所以有人話「白鴿黨」俾外來勢力騎劫咗，我零零發覺得一啲都唔出奇！

2014非法佔中令社運進入「遍地開花」時代，打著「本土」同「勇武」旗號嘅激進派崛起，所以賣溫和嘅「白鴿黨」，影響力大不如前。「白鴿黨」為咗搶選票、保議席、撬金主，再一次做咗個自掘墳墓嘅決定，就係同激進派同流合污，令到成個黨都變晒質，同政府對著幹，為反而反。「白鴿黨」曾經係中環「誓師」，表明若日後行政長官嘅選舉方案唔係真普選，佢哋就會參與「非法佔中」。當時黨入面一啲溫和派嘅黨員，好似狄X遠咁，都因為睇唔過眼而主動退黨。

到咗2019年黑暴，「白鴿黨」已經變得非常激進，老鴿嫩鴿傾巢而出，支持班暴徒四出打、搶、砸。當年7月1日「弱智瘋」帶住班暴徒一齊衝擊立法會、7月21日「高佬廷」就喺元朗港鐵站帶頭搞暴動、11月末代黨主席羅XX亦出現係理大暴動現場……當時嘅「白鴿黨」已成為一言堂，容不下第二把聲音；當日創黨成員陳莊X撰文抨擊黑暴，竟被即時革除黨席；不過佢就因禍得福，同反中亂港派割蓆。

唔知係咪上帝要你滅亡，必先令你瘋狂。「白鴿黨」喺2019年區議會選舉嘅時候，呃到班市民嘅支持，得到91個議席。但攞到咁多議席之後，「白鴿黨」不但無聚焦經濟民生，發揮正面作用，反而喺議會不斷「拉布」，令香港陷入嚴重嘅政治內耗。

喺2020年頭，「白鴿黨」又高調支持「戴妖」嘅「攬炒十部曲」，即使到《香港國安法》生效之後，呢班「鴿」仲繼續大模廝樣咁，參與推翻特首嘅非法初選，為「攬炒十部曲」鋪路，赤裸裸咁挑戰法律同顛覆國家政權。可能啲「鴿」當時仲好天真咁諗，以為就算有事，都仲有「生果佬」同背後美帝頂住。最終，9名參與「攬炒」圖謀嘅「白鴿黨」成員，分別被判4年2個月至7年不等。

2020年底，特區政府依法取消咗多名反中亂港嘅議員資格，「白鴿黨」嘅立法會議席亦因此全數「清零」。2021年立法會換屆選舉嗰陣，一眾「白鴿黨」骨幹，唔係犯國安或暴動罪，齊齊喺監獄團聚緊，就係流亡海外。所以「白鴿黨」根本派唔到人出嚟參選，於是立法會議席再次「食蛋」! 連議席都冇，又點可以發揮影響力呢？

一個政黨成功，我零零發覺得需要有幾個元素，互相緊扣一齊。第一，政黨有清晰嘅理念；第二，有一班支持呢個理念嘅市民；最後，要有一班有執行能力、有遠見嘅領袖。當年「白鴿黨」創黨嘅時候，定咗10個基本信念。第一個就係「香港是中國不可分割的一部分，我們支持香港回歸中國。」相信當年好多市民都因為咁，而支持「白鴿黨」。但咁多年來，「白鴿黨」不但違背初心，選擇走上反中亂港嘅不歸路，而且一而再，再而三損害香港人嘅利益，仲接受黑金，放棄非暴力嘅底線，最終令到支持佢嘅市民逐漸離棄佢哋。而「白鴿黨」內，坐監嘅入咗監倉，走咗佬嘅大佬，就喺遠方叫人衝，自己鬆。而有能力擔大旗嘅人幾乎係冇，試問個黨點可以運作落去呢？所以解散是必然嘅事!!!

「白鴿黨」既然衰咗，就好心靜靜雞解散就算啦喇，做乜跌落地揦返拃沙?成日暗示有中間人叫佢哋摺埋，等到坊間亦有好多唔同嘅揣測……如果你俾我零零發「猜猜誰是中間人」，我會話係美角叫佢哋收檔多啲囉! 因為佢哋已經冇閑錢養「鴿」；就算有，「白鴿黨」做嘅嘢都不成氣候，冇料到、幫唔到手，而家仲唔叫你摺埋等幾時呀？

鍾情局．零零發