披着紅衣神袍嘅「犯民大教主」

由英國殖民地到而家，耶穌教係香港第一大宗教，信徒有專業人士、勞動階層、家庭主婦同學生，有老又有嫩，所以神職人員一言一行嘅影響，真係好大同好深㗎！

我零零發成家人都係虔誠嘅耶穌教教徒，而我中小學亦都係喺耶穌教學校讀書，所以我一直都好尊重神父、修女。宗教領袖一向俾大家嘅感覺，應該係德高望重、持平、廣結善緣嘅人。但係香港就有一名前主教，佢嘅言行作風，偏偏同一般人對主教嘅諗法好有出入！ 唔信嘅話，不如大家一齊倒帶睇吓……
「前主教」生於上海，16歲逃難到香港，係香港同意大利修讀神學，讀完哲學博士學位返嚟之後，就分別係澳門同香港做過校長，佢後來仲做埋香港教區主教。

「前主教」喺2002年接任冇幾耐，就已經在2003年高調出嚟參與遊行，反對23條立法，又呼籲信徒要出嚟遊行，話咁先至對得住自己嘅良心同下一代喎！ 「前主教」同「犯民」同聲同氣，唔知仲以為佢係「犯民」代言人添！ 點解一位宗教領袖對一條保護香港、維護國家安全嘅法例有咁大反應嘅？ 其實佢有幾了解條法例呢？

係2004年7月，教統局通過「校本條例」，目的只係要全港津貼學校，增加學校各方「持份者(stakeholders)」嘅參與，優化學校管治咁簡單。但「前主教」又斷章取義話「校本條例」會影響教育團體辦學理念同自由，所以用教會名義控訴「校本條例」違反《基本法》，雖然政府最後都打贏官司，但都糾纏咗成6年！ 而期間不幸有兩個教師因為個人工作壓力自殺，「前主教」又魚目混珠亂嗡話政府害死呢兩位教師，點解神職人員會咁講嘢㗎？！

2014年「佔中」事件中，「前主教」就好大力支持「佔中三丑」，話公民抗命係爭取普選嘅好方法，佢不但到金鐘現場支持學生罷課，仲發表公民抗命嘅「穢論」……不過佢每次發表完「穢論」之後都好識得包底，話自己反對暴力㗎，更做樣祝福維持秩序嘅警務人員。後來事件演變成動亂，佢就卸責話班學生騎劫咗個運動，又指責政府清場，佢仲話警方施放催淚彈對班學生嘅「小兒科暴力」，係小題大做咁話。唉！又係「前主教」你當日去宣揚公民抗命呢個歪理，又係你鼓動學生與政府對抗，到後來失控，你又撇清責任，乜你冇估計到個結果㗎咩？

到2019年發生黑暴事件，「前主教」不時都會到場，撐著黃傘，豎起大姆指，向騷亂嘅人群吶喊支持，鼓動信徒去立法會外唱聖詩，又分發食物，開放啲教會地方俾班「暴力示威者」換衫，做佢哋嘅後援。其後「前主教」更有份成立「碌柚葉基金」，美其名就話幫啲「暴力示威者」提供醫療、心理同法律支援，等佢地冇後顧之憂，實質背後目的咪支持佢哋去延續黑暴囉！ 當年8月係黑暴如火如荼之際，佢被人映到係中環一間餐廳，同「生果佬」、「陳四萬」、「白頭李」、「AV仁」及一名美國國家安全顧問克里斯蒂安．惠頓（Christian Whiton）坐埋一齊，惠頓曾是美國小布殊政府的特別顧問。成班人同「外國勢力」坐埋一齊，談笑風生，佢哋究竟喺度搞緊乜？！

「前主教」除咗對社會議題非常狂熱之外，佢仲有兩件好吊詭嘅事，我零零發想同大家分享吓。 係2011年，據一份維基解密文件中顯示，「生果佬」係2005 至2010年，一共俾咗2000幾萬「前主教」，當年香港耶穌教教區已經否認教區有收過呢筆巨款，「前主教」就吚吚哦哦，話呢筆錢係用喺一啲唔方便用教會經費嘅事喎，例如:捐款俾內地地下教會啦、捐錢俾海外天災嘅人道救援、同小朋友旅行、參加聖誕聯歡會…… 仲有，因為自己年紀大，要買商務客位機票去羅馬等地參加宗教會議咁話！真係人唔笑、狗都吠啦！

首先，點解要俾錢內地地下教會？咁咪破壞緊中國與梵蒂岡教廷之間嘅關係？抑或想顛覆中央政府政權？ 佢身為香港教區嘅主教，究竟佢係為「生果佬」定「梵蒂岡教廷」服務㗎？ 除咗資助內地地下教會之外，點解本地教會唔可以堂堂正正收呢啲捐款去做「前主教」口中講嘅事？ 再者，點解「生果佬」自己唔去做「前主教」口中嘅事？ 有得威之餘，又可以出名，點解要俾個光環你呢個白頭主教？！另外，最近法庭係「生果佬」單案提及，「生果佬」係2013年，即係佔中前一年，又分兩次入咗350萬俾「前主教」，唔知佢打算幾時出嚟交代呢350萬又用嚟做咗咩呢？總之，我零零發覺得成件事就古靈精怪，偏離咗一個正常嘅神職人員操守！

主教係教區內最高牧者，負責管理、訓導同聖化天主子民嘅職務，亦要培育教友的信仰及道德生活，推行傳播福音嘅工作。除此之外，主教另外一個重要任務就係同其他地方教會及普世教會保持連繫，維護教會嘅共融團結。作為香港教區嘅主教，唔知佢履行咗幾多呢啲正正經經的職責呢？
我零零發從細到大，無論係耶穌教嘅家人或者係學校嘅老師，都係教我哋向善、做好人、做好事。 我從來只知道作為一個教徒要奉獻，但從冇諗過作為一個教徒，仲要係一個教區嘅話事人，係可以去收錢搭飛機坐商務位嘅！ 一個退休主教要咁多錢做咩呢？喺道德標準上，係咪同一個宗教領袖有好大落差呢？

一個神職人員，咁過份參與政治、咁過份同反政府嘅「犯民」埋堆，又有咩目的呢？雖然佢好似冇直接鼓吹暴力，但係喺宗教上有咁崇高地位嘅人，佢應該義無反顧咁，反對任何形式嘅暴力！ 但佢冇，佢反而喺度曲線咁支持呢啲暴力行為！！ 我從來冇諗到一個宗教領袖係會做呢啲嘢，我真係唔希望佢嘅個人行為同操守，影響晒成個宗教嘅清譽！！！！

披著紅衣神袍嘅主教，冇好好利用信仰去感化眾人，反而利用宗教身份、平台去誤導信徒同年青人，所以我零零發認為與其稱呼佢係前主教，不如叫佢做披着紅衣嘅「犯民大教主」更加貼切！

鍾情局．零零發

鍾情局

** 博客文章文責自負,不代表本公司立場 **

「白鴿黨」4月13號召開特別會員大會，通過授權中央委員會，跟進解散一事。黨主席羅XX一直冇透露解散具體原因，而陰謀論者就不斷講有中間人，威脅「白鴿黨」解散。

「白鴿黨」1994年成立，以「理性、溫和民主派」做定位。當時嘅黨員有律師、社工、又有校長、教師，都可以講係星光熠熠，所以輝煌時期佢係香港最大嘅政黨之一，亦都係立法會嘅第一大黨，但點解31年後會落得如此下場？我零零發今次嘗試用一個普通人嘅角度，睇吓「白鴿黨」點解會壽終正寢。

「白鴿黨」最大嘅錯誤就係黐咗「生果佬」! 睇返「生果佬」單案審訊時透露出來的堅料，發現早在喺2013年10月到2020年4月，「白鴿黨」透過「生果佬」親信「肥仔Mark」，一共收咗接近$3400萬嘅捐款。但係「生果佬」嘅捐款，究竟係自己扲荷包，定係背後有美角支水喉，到而家都係一個謎!「白鴿黨」究竟用咗啲錢去做咩呢？呢個係第二個謎! 收得人咁多錢，如果話「白鴿黨」嘅決策同行動無被影響到，都好難令人信服！

而令「白鴿黨」行錯路嘅另外一個人物，就係創黨主席「白頭李」。聽聞1989年六四事件之後，「白頭李」已經同美國有千絲萬縷嘅關係。「白頭李」係回歸前後分別有兩個美角女人做佢私人助手，分別係Minky Worden 同Ellen Bork。前者嚟香港之前，喺美角司法部工作，佢老公係美角「華x街日報」前出版人；而後者係一個美角右翼智庫組織嘅要員，高人話呢個組織嘅主要工作，係干預香港事務同埋針對美角政府對香港嘅政策，傳聞時任美角副總統、正副國防部長都係呢個組織嘅成員添?!咁點解呢兩位女士肯咁屈就，來香港做「白頭李」個私人助理，大家諗下啦！

另外喺法庭審訊入面睇到，「生果佬」同美角嘅關係非常密切，而「生果佬」又同「白頭李」好鬼老友；好似係喺2014年佔中前，呢個「白頭李」、前主席「AV仁」、創黨元老「李X達」等，就已經跟「生果佬」眉來眼去，仲斷正俾傳媒，影到幾個人經常去「生果佬」屋企食飯、甚至上埋佢隻遊艇同啲外籍人士密密斟。所以有人話「白鴿黨」俾外來勢力騎劫咗，我零零發覺得一啲都唔出奇！

2014非法佔中令社運進入「遍地開花」時代，打著「本土」同「勇武」旗號嘅激進派崛起，所以賣溫和嘅「白鴿黨」，影響力大不如前。「白鴿黨」為咗搶選票、保議席、撬金主，再一次做咗個自掘墳墓嘅決定，就係同激進派同流合污，令到成個黨都變晒質，同政府對著幹，為反而反。「白鴿黨」曾經係中環「誓師」，表明若日後行政長官嘅選舉方案唔係真普選，佢哋就會參與「非法佔中」。當時黨入面一啲溫和派嘅黨員，好似狄X遠咁，都因為睇唔過眼而主動退黨。

到咗2019年黑暴，「白鴿黨」已經變得非常激進，老鴿嫩鴿傾巢而出，支持班暴徒四出打、搶、砸。當年7月1日「弱智瘋」帶住班暴徒一齊衝擊立法會、7月21日「高佬廷」就喺元朗港鐵站帶頭搞暴動、11月末代黨主席羅XX亦出現係理大暴動現場……當時嘅「白鴿黨」已成為一言堂，容不下第二把聲音；當日創黨成員陳莊X撰文抨擊黑暴，竟被即時革除黨席；不過佢就因禍得福，同反中亂港派割蓆。

唔知係咪上帝要你滅亡，必先令你瘋狂。「白鴿黨」喺2019年區議會選舉嘅時候，呃到班市民嘅支持，得到91個議席。但攞到咁多議席之後，「白鴿黨」不但無聚焦經濟民生，發揮正面作用，反而喺議會不斷「拉布」，令香港陷入嚴重嘅政治內耗。

喺2020年頭，「白鴿黨」又高調支持「戴妖」嘅「攬炒十部曲」，即使到《香港國安法》生效之後，呢班「鴿」仲繼續大模廝樣咁，參與推翻特首嘅非法初選，為「攬炒十部曲」鋪路，赤裸裸咁挑戰法律同顛覆國家政權。可能啲「鴿」當時仲好天真咁諗，以為就算有事，都仲有「生果佬」同背後美帝頂住。最終，9名參與「攬炒」圖謀嘅「白鴿黨」成員，分別被判4年2個月至7年不等。

2020年底，特區政府依法取消咗多名反中亂港嘅議員資格，「白鴿黨」嘅立法會議席亦因此全數「清零」。2021年立法會換屆選舉嗰陣，一眾「白鴿黨」骨幹，唔係犯國安或暴動罪，齊齊喺監獄團聚緊，就係流亡海外。所以「白鴿黨」根本派唔到人出嚟參選，於是立法會議席再次「食蛋」! 連議席都冇，又點可以發揮影響力呢？

一個政黨成功，我零零發覺得需要有幾個元素，互相緊扣一齊。第一，政黨有清晰嘅理念；第二，有一班支持呢個理念嘅市民；最後，要有一班有執行能力、有遠見嘅領袖。當年「白鴿黨」創黨嘅時候，定咗10個基本信念。第一個就係「香港是中國不可分割的一部分，我們支持香港回歸中國。」相信當年好多市民都因為咁，而支持「白鴿黨」。但咁多年來，「白鴿黨」不但違背初心，選擇走上反中亂港嘅不歸路，而且一而再，再而三損害香港人嘅利益，仲接受黑金，放棄非暴力嘅底線，最終令到支持佢嘅市民逐漸離棄佢哋。而「白鴿黨」內，坐監嘅入咗監倉，走咗佬嘅大佬，就喺遠方叫人衝，自己鬆。而有能力擔大旗嘅人幾乎係冇，試問個黨點可以運作落去呢？所以解散是必然嘅事!!!

「白鴿黨」既然衰咗，就好心靜靜雞解散就算啦喇，做乜跌落地揦返拃沙?成日暗示有中間人叫佢哋摺埋，等到坊間亦有好多唔同嘅揣測……如果你俾我零零發「猜猜誰是中間人」，我會話係美角叫佢哋收檔多啲囉! 因為佢哋已經冇閑錢養「鴿」；就算有，「白鴿黨」做嘅嘢都不成氣候，冇料到、幫唔到手，而家仲唔叫你摺埋等幾時呀？

鍾情局．零零發