亂象叢生嘅前世今生

最近睇啲衙門新聞真係越睇越驚心、越睇越擔心，好似「屠龍小隊」案、「35+顛覆」案，同埋而家審緊嘅「生果佬」案、「醫院口岸爆炸」案等等，串埋一齊去睇，我零零發覺得，樣樣嘢都唔係無端端發生，全部都係有跡可尋，好似一直有啲幕後玩家利用咗班「犯民」，儲心積累想搞冧香港。由街頭抗爭到議會鬧劇，全方位360度去大幅度搞搞震。所以我零零發想趁住就嚟踏入2025年，疏理一下過去喺香港發生嘅事。

雖然香港係「示威之都」，但係回歸之初大多數嘅遊行示威，都係相對冇咁激進，每年嘅維園六四公眾集會，或者七一大遊行，參與人數雖然多，但係除咗一啲想出位嘅議員或者激進人士，會同警察衝突之外，其他人都係齋行齋坐，都算得係有秩序。但係最近十幾年，「犯民」利用唔同議題，激化咗社會矛盾同埋對政府嘅不滿，抗爭就越演越激烈，不斷去測試政府底線！好似2009年「反對興建高鐵」事件，示威者就開始嘗試包圍政府總部同禮賓府，同警方對峙；到2014年6月「反新界東北撥款」示威，啲示威者喺立法會議員同「犯民」加持之下，就開始變得暴力，不但強行闖入立法會大樓靜坐，更令到多個保安員受傷，最後要出動好多年無見過嘅防暴警察，暴力示威先至平息到。

到2014年下半年，「佔中三丑」嘅戴妖以「公民抗命、違法達義」呢個歪理，去鼓動年輕人同學生出來犯法，借「全民普選特首」呢個偽命題，去發動大規模示威。慶幸呢個歷時79日嘅非法佔中，冇做成太大規模嘅破壞，但係就種大咗好多人個膽，捧紅咗一班所謂「學生領袖」，好似黃痴瘋、岑傲廢，週永骯、衣冠聰之流。 好可惜當時政府同社會都掉以輕心，以為雨過天青就當無事，而各「犯民」黨派更利用一般人對「未來主人翁」比較仁慈同體諒嘅心態，趁機拉埋學生同青年人落水!

到2016年農曆年，「犯民」又借食環署係旺角趕走無牌小販為藉口，有意在網上號召市民衝擊執法人員，更將反抗行動升級，圍堵馬路，到處放火燒雜物，包圍同襲擊到場維持秩序嘅警察，最後警察向天開咗兩槍示警，事件中有大學生被捕同唔少人受傷。但係呢兩槍無令到香港人醒覺，反而俾啲大學學生會同「犯民」組織偷換概念，變成政府冇聽民意，不當咁處理社會矛盾，所以引起暴亂喎!

自此之後，各「犯民」黨派更加好似打咗枝強心針咁，到處用歪理去支持班年青暴徒嘅非法行為，好似係2017年，立法會議員羊鱷Q竟然講出「有案底可以令人生更精彩……」嘅痴人夢話，推班青年人跳落懸崖去死！當時大大小小反政府嘅遊行示威，好似「真普選大遊行」、「反高鐵一地兩檢大遊行」同「反對東大嶼人工島大遊行」等等，都明顯咁見到好多年輕人嘅足跡同暴力行為！

到2019年，香港人陳同佳在台灣殺咗女朋友，由於香港同台灣並無司法互助同移交逃犯協議，特區政府為咗維護法治同公義，打算將喺台灣着草返香港嘅通緝犯陳同佳，交比台灣審訊，於是就提出修訂「逃犯條例」，但就被各「犯民」黨派抹黑，話想借修訂為名，以後可以任意將罪犯移交內地，冇曬人權同自由，為所欲為咁話。隨後就發生咗大半年嘅黑暴事件，好明顯就係「犯民」夾埋外力喺度搞革命，想推翻政府，實現佢地上台執政嘅春秋大夢。

「犯民」除咗利用社會議題搞一啲街頭抗爭之外，亦都詐詐諦諦喺度利用選舉、議會嘅運作去搗亂！首先就喺2010年以爭取「真普選」呢個噱頭，玩一個「五區公投」。當時佢哋係五個立法會選區，每度搵一個「犯民」嘅議員辭職，然後就搞補選，咁樣全香港嘅所有已登記嘅選民都可以去投票，咁等如變相嘅公投喎！佢哋諗住五區補選嘅投票率超過50%同埋「犯民」勝出，就代表有民意基礎去支持「真普選」，如果特首唔可以喺一年之內交出個普選嘅路線圖，所有「犯民」嘅議員就會集體請辭，唔再參加補選，同時要求當時行政長官下台謝罪⋯⋯睇吓，又係最後想逼行政長官下台，搞亂成個社會秩序！嗰次所謂公投嘅投票率得17%，所以隻隻「犯民」變鵪鶉無聲出。而當時五區公投係用「全民起義」作為政治宣傳口號，當時好多評論已經講，呢個其實係一種「港獨」搞革命思想嘅前身！

到2019社會暴亂失敗之後，「犯民」又再一次就從議會入手惡搞，由戴妖牽頭攪咗個「35+」顛覆大計，希望用操控選舉嘅方法，攞到立法會大多數35個或以上議席，咁就可以用無差別嘅否決權去多次推翻財政預算案，逼特首辭職、令政府停頓、社會陷入混亂嘅狀態，到時「犯民」同暴徒就可以配合外力去推翻政府，好慶幸呢單嘢又失敗告終！

香港回歸之前，美西方已經係香港唔同嘅政治團體、工會、NGO、大學、傳媒、宗教組織埋曬地雷，為亂港作出部署，打算攬炒香港一鑊熟！立體啲睇返我頭先所講嘅嘢，每一次都係「犯民」同美西方合演的一場大龍鳳！由街頭到議會、政府運作都俾佢哋有組織咁喪搞! 首先就係利用社會議題進行分化，搞啲街頭抗爭，同啲警察推推撞撞試水溫；之後就先包圍，繼而衝入啲議會、辦公室；跟住再將暴力升級，放火、掟汽油彈、做炸彈、襲擊警察等等。另一方面，佢哋一次又一次濫用制度，破壞議會嘅運作，打算逼特首下台，令到政府癱瘓。每一次我哋都好天真咁以為將件事擺平咗，其實一啲都唔係，其實人哋係喺度做緊綵排，一次一次咁樣加碼「升呢」。2019黑暴之後，社會好似平靜安穩咗，但係美西方係唔會死心嘅，佢哋霸權嘅DNA係唔會比中國爬過頭，而香港正正係中國對外開放嘅國際城市，一個最好嘅切入點，冇人知幾時會有下一波黑暴出現，所以老土啲都要講句： 「居安思危」係必須的！如果唔係有起事上嚟，報「東張」都太遲啦！

鍾情局．零零發

鍾情局

** 博客文章文責自負,不代表本公司立場 **

「白鴿黨」4月13號召開特別會員大會，通過授權中央委員會，跟進解散一事。黨主席羅XX一直冇透露解散具體原因，而陰謀論者就不斷講有中間人，威脅「白鴿黨」解散。

「白鴿黨」1994年成立，以「理性、溫和民主派」做定位。當時嘅黨員有律師、社工、又有校長、教師，都可以講係星光熠熠，所以輝煌時期佢係香港最大嘅政黨之一，亦都係立法會嘅第一大黨，但點解31年後會落得如此下場？我零零發今次嘗試用一個普通人嘅角度，睇吓「白鴿黨」點解會壽終正寢。

「白鴿黨」最大嘅錯誤就係黐咗「生果佬」! 睇返「生果佬」單案審訊時透露出來的堅料，發現早在喺2013年10月到2020年4月，「白鴿黨」透過「生果佬」親信「肥仔Mark」，一共收咗接近$3400萬嘅捐款。但係「生果佬」嘅捐款，究竟係自己扲荷包，定係背後有美角支水喉，到而家都係一個謎!「白鴿黨」究竟用咗啲錢去做咩呢？呢個係第二個謎! 收得人咁多錢，如果話「白鴿黨」嘅決策同行動無被影響到，都好難令人信服！

而令「白鴿黨」行錯路嘅另外一個人物，就係創黨主席「白頭李」。聽聞1989年六四事件之後，「白頭李」已經同美國有千絲萬縷嘅關係。「白頭李」係回歸前後分別有兩個美角女人做佢私人助手，分別係Minky Worden 同Ellen Bork。前者嚟香港之前，喺美角司法部工作，佢老公係美角「華x街日報」前出版人；而後者係一個美角右翼智庫組織嘅要員，高人話呢個組織嘅主要工作，係干預香港事務同埋針對美角政府對香港嘅政策，傳聞時任美角副總統、正副國防部長都係呢個組織嘅成員添?!咁點解呢兩位女士肯咁屈就，來香港做「白頭李」個私人助理，大家諗下啦！

另外喺法庭審訊入面睇到，「生果佬」同美角嘅關係非常密切，而「生果佬」又同「白頭李」好鬼老友；好似係喺2014年佔中前，呢個「白頭李」、前主席「AV仁」、創黨元老「李X達」等，就已經跟「生果佬」眉來眼去，仲斷正俾傳媒，影到幾個人經常去「生果佬」屋企食飯、甚至上埋佢隻遊艇同啲外籍人士密密斟。所以有人話「白鴿黨」俾外來勢力騎劫咗，我零零發覺得一啲都唔出奇！

2014非法佔中令社運進入「遍地開花」時代，打著「本土」同「勇武」旗號嘅激進派崛起，所以賣溫和嘅「白鴿黨」，影響力大不如前。「白鴿黨」為咗搶選票、保議席、撬金主，再一次做咗個自掘墳墓嘅決定，就係同激進派同流合污，令到成個黨都變晒質，同政府對著幹，為反而反。「白鴿黨」曾經係中環「誓師」，表明若日後行政長官嘅選舉方案唔係真普選，佢哋就會參與「非法佔中」。當時黨入面一啲溫和派嘅黨員，好似狄X遠咁，都因為睇唔過眼而主動退黨。

到咗2019年黑暴，「白鴿黨」已經變得非常激進，老鴿嫩鴿傾巢而出，支持班暴徒四出打、搶、砸。當年7月1日「弱智瘋」帶住班暴徒一齊衝擊立法會、7月21日「高佬廷」就喺元朗港鐵站帶頭搞暴動、11月末代黨主席羅XX亦出現係理大暴動現場……當時嘅「白鴿黨」已成為一言堂，容不下第二把聲音；當日創黨成員陳莊X撰文抨擊黑暴，竟被即時革除黨席；不過佢就因禍得福，同反中亂港派割蓆。

唔知係咪上帝要你滅亡，必先令你瘋狂。「白鴿黨」喺2019年區議會選舉嘅時候，呃到班市民嘅支持，得到91個議席。但攞到咁多議席之後，「白鴿黨」不但無聚焦經濟民生，發揮正面作用，反而喺議會不斷「拉布」，令香港陷入嚴重嘅政治內耗。

喺2020年頭，「白鴿黨」又高調支持「戴妖」嘅「攬炒十部曲」，即使到《香港國安法》生效之後，呢班「鴿」仲繼續大模廝樣咁，參與推翻特首嘅非法初選，為「攬炒十部曲」鋪路，赤裸裸咁挑戰法律同顛覆國家政權。可能啲「鴿」當時仲好天真咁諗，以為就算有事，都仲有「生果佬」同背後美帝頂住。最終，9名參與「攬炒」圖謀嘅「白鴿黨」成員，分別被判4年2個月至7年不等。

2020年底，特區政府依法取消咗多名反中亂港嘅議員資格，「白鴿黨」嘅立法會議席亦因此全數「清零」。2021年立法會換屆選舉嗰陣，一眾「白鴿黨」骨幹，唔係犯國安或暴動罪，齊齊喺監獄團聚緊，就係流亡海外。所以「白鴿黨」根本派唔到人出嚟參選，於是立法會議席再次「食蛋」! 連議席都冇，又點可以發揮影響力呢？

一個政黨成功，我零零發覺得需要有幾個元素，互相緊扣一齊。第一，政黨有清晰嘅理念；第二，有一班支持呢個理念嘅市民；最後，要有一班有執行能力、有遠見嘅領袖。當年「白鴿黨」創黨嘅時候，定咗10個基本信念。第一個就係「香港是中國不可分割的一部分，我們支持香港回歸中國。」相信當年好多市民都因為咁，而支持「白鴿黨」。但咁多年來，「白鴿黨」不但違背初心，選擇走上反中亂港嘅不歸路，而且一而再，再而三損害香港人嘅利益，仲接受黑金，放棄非暴力嘅底線，最終令到支持佢嘅市民逐漸離棄佢哋。而「白鴿黨」內，坐監嘅入咗監倉，走咗佬嘅大佬，就喺遠方叫人衝，自己鬆。而有能力擔大旗嘅人幾乎係冇，試問個黨點可以運作落去呢？所以解散是必然嘅事!!!

「白鴿黨」既然衰咗，就好心靜靜雞解散就算啦喇，做乜跌落地揦返拃沙?成日暗示有中間人叫佢哋摺埋，等到坊間亦有好多唔同嘅揣測……如果你俾我零零發「猜猜誰是中間人」，我會話係美角叫佢哋收檔多啲囉! 因為佢哋已經冇閑錢養「鴿」；就算有，「白鴿黨」做嘅嘢都不成氣候，冇料到、幫唔到手，而家仲唔叫你摺埋等幾時呀？

鍾情局．零零發